Ｍ： 写真や家（やー）んかい咲（さ）ちゅーぬ花（ぱな）えんばーえっしが、あんねーぬ花見っち毎日（めーなち）暮らさりばしむしが、沖縄（うちなー）ぬ現実んりいうしや思（うみ）ぬぐとぅやならん。
Ｓ：やっけーなむんえっさーやー。えっしが、ハイビスカスや黄色花（きーるーぱな）ぬ一番すらさぬやー。
Ｍ：あいえっさ。３連休や家んかいけーてぃ、池ぬ掃除しちゃい、草はたい、前（めー）に切（ち）っちぇーたぬベンシルーぬ枝（ゆだ）せーきたいしち、２日（ぷちか）暮らちゃんばーえっさ。さんねーならぬくとぅぬまんでぃ。
Ｓ：てーげーうたいむんえっさーや。
Ｍ：毎日（めーなち）海んかい行じてぃカヌーふじゅぬうっぴーじんうたいむんえっしが、３連休りちんなかなかゆくるぬ暇（ぴま）んねーらぬ。
Ｓ：あんちえってぃん、カヌーふがぬうっぴーじ、腕（うでぃ）ぬうたいや取（とぅ）らりーくせーら。
Ｍ：うぬ分やたしかとぅんやー。歳（とぅし）ん５０余いねーから、ぐてーぬくんちぬねーんなてぃ、むちのーすしんにーさぬ、思（うみー）ぬぐとぅ、体（どぅー）んかなんさーやー。
Ｓ：うりや仕方ねーんさ。ないぬうっぴーじしみるする、んでぃ思（うみー）ぬぐとぅさんねーストレスぬ溜まいしが。
Ｍ：うりやあいえっしがよー。
Ｓ：咲（さ）ちゅぬ花（ぱな）やすらせーしが、花や実（みー）ならすぬたみにる咲ちゅーとぅよ。すらせんでぃいうしや人（ちゅー）ぬ思（うむ）いるえーる、植物からしーねー人（ちゅー）がぬーり思（うまー）ばん、しむんばーえっさ。
Ｍ：睡蓮ぬん、ハイビスカスんぬん、実（みー）やならんしがや。
Ｓ：実（みー）やならんてぃん、花咲かち子孫（くゎーまーが）やぴるがいんばーえっさ。
Ｍ：辺野古（ひぬく）ぬ新基地（みーむんきち）造（ちく）らーりすーし、止（とぅ）みるんでぃいうぬ思（うむ）いん実（みぬ）らさんねーならんばーえっしが。
Ｓ：花（ぱな）ぬすらさや実らちる意味んあいる。
Ｍ：あいえっさ。
Ｓ：県知事選挙ん真っ盛りえんばーえっしが、陸じん海じん難儀（なんじ）ひちゅーぬ人達（ちゅたー）思（うむ）い実（みぬ）らさんねーならんしが。
