Ｍ：ウチナーぬん冬（ぷゆ）ないばからや、てーげーぴーせんばーえっしが、めーなち海かい行じてぃカヌーふじゅしん、てーげー難儀（なんじ）わじゃえっさーやー。
Ｓ：なんじえってぃんさんねーならんばーえっさ。ちゃっさ選挙じ勝たばん、日本政府りいうしやウチナーぬ民意や知らんぷーなーしち、新基地建設ぬ工事強行すんばーえっとぅ。
Ｍ：わたーむげーてぃ、ぷしがらんさーやー。
Ｓ：ウチナンチューやちゅーにんじんりち思（うむ）とぅらんばーてー、腐りヤマトゥぬ政府や。ウチナンチューぬ１票やヤマトゥ政府んかい有利えーば意味あいしが、不利えーねー意味ねんばーてー。
Ｍ：ウチナーやあんちまでぃうしぇらってぃやー。
Ｓ：わじわじーしちぷしがらぬ。しんじんとぅぐゎーくるしぶさるあいる。やがてぃや一線ふいらんねーならんばーがやーりち、どぅなーじ心配（しわー）ないぬばーんあんば－えっしが。
Ｍ：どぅく独断先行（どぅーちゅいじさちばい）さんきどーやー。
Ｓ：分かてぃやういしが、いちまでいんにじららんとぅや。
Ｍ：海かい行（い）じりば海上保安庁ぬクルマジムンたーが、カヌーんかいしーぶさかってぃすんばーえっとぅ、最低限ぬ抵抗やさんねーならんしが。小笠原諸島じ中国ぬ漁船ぬ赤珊瑚乱獲すーしかいや手（てぃー）のーりゆさぬしぴたいむんたーぬ、どぅーくるさーじふじゅぬカヌーかいや、ちゅーばーふーなしち手（てぃー）のーるんばーてー、海保や。
Ｓ：恥（ぱじ）んねんばーげらやー。
Ｍ：税金泥棒りいうぬ言葉（くとぅば）ぬあいしが、うったーや税金暴力団るえっしが。
Ｓ：じゅんにあいえっさ。黒装束（くるすがい）しち面（ちら）はんくちゃっくし見（みー）ば、イスラム国ぬテロリストかいる、ゆー似（なー）とぅーる。
Ｍ：中身やゆぬむんるえっさに。身代金とぅらーぬうっぴーるえーる。暴力じ人（ちゅー）うみぬぐとぅなさーりすーしや、テロリストとぅゆぬむんやあらんな？
Ｓ：えっしがちゃっさテロリストりいちんや、アメリカ軍ぬ中東ぬ人（ちゅ－）殺（くる）すしかいやかなんさ。元（むとぅ）から言いねー、アメリカぬ軍隊がる世界最悪ぬテロリストるえーる。
Ｍ：うんねーぬアメリカーぬ軍隊ぬウチナーんかい、うっさきなーなー有（あい）しんかい抗議すーしや、ぬーん異風なくとぅやあらん。沖縄戦じまーちぇーぬ人達（ちゅーたー）ぬくとぅ思（うむ）いねー、反対すーしや当たり前（あてーめー）ぬくとぅやあらんな。ぬーりちウチナンチューぬ米軍ぬかしーさんねーならんが。
Ｓ：あいえっさ。
Ｍ：沖縄戦（ウチナーぬいくさ）から７０年、うんなげー哀りしみてぃんあいあらん、なまから先（さち）んウチナンチュー哀りしみれーんでぃいうぬ政府、うりや我ったーむんやあらんどーやー。
Ｓ：ヤマトゥぬ政府やちゃーあんちよ。腐り安倍政権ぬ海保使（ちか）てぃ、とーなんでぃ思（うむ）とぃねー我んたっぴらかちめー。死ぬしやぬーん怖（うとぅ）るくねーん、なまからーん海ぬういじがーすーとぅや、うびとーきよー。
