Ｍ：１１月２４日やあんまー方ぬぱっぱーぬ３３年忌えったんばーえっしが…。
Ｓ：終（うわ）いすーこーえってーさや。
Ｍ：うりじ神になてぃ、ニライカナイんかい行（い）じゃんばーえっさ。
Ｓ：３３年りいちん、あんちぺーせーる。
Ｍ：あんすとぅよー。最後に話（ぱなし）しちゃーぬばー、我（わん）や貧乏者（ぴんすーむん）りちうしぇらったーしが、うみちかちばてぃ、娘二人（うぃなぐんぐゎたい）高校までぃやらちゃんよー、りち何回ぬん言ちゅたーし忘（わし）ららんさ。
Ｓ：うりが誇りえってんばーえっさ。
Ｍ：どぅなーが七歳じうぇんじゃっくゎに行じゃさってぃ、学校にん行からぬ、字（じー）習るぬくとぅんならん、うみちか苦労しちぇーがはじえっとぅやー。子（くゎー）んかいや、ゆぬ哀りしみぶくねんてんばーえっさ。
Ｓ：まーす売やーしち屋我地から読谷までぃ歩っちいじゃんでぃ言うてーとぅやー。あんち難儀（なんじ）しちん、よーぴなーる儲きらりてーがはじえっしが。
Ｍ：うぃきがわらびぬ生っちゅりば、なーよーぴや楽んないてーぬはじえっしがやー。
Ｓ：せっかく戦から生ち延（ぬ）びてーむん、事故にあーてぃ七歳じまーち、肝苦（ちむぐ）るさぬやー。
Ｍ：なまや親子（うやっくゎ）むるまじゅん、孫（まーが）、ひ孫ぬ姿（しがた）見っち、二人（たい）ぬむんぬあんち栄（さけー）てぃ、でぃかちぇーさりいち、ういでぃきさしちういるする。
Ｓ：笑とぅぬ声（ふい）ぬ聞（し）かりぬぐとぅあいさ。
Ｍ：墓掃除に行じ、御香（うこー）うさぎてぃ手（てぃー）合（あー）ちから、どぅーちゅい残（ぬく）てぃ写真ぬじゅたとぅよー、コノハチョウぬ飛（とぅ）じちー墓ぬまんまる飛びたんばーてー。
Ｓ：あんねーぬくとぅんあいさやー。なまやなーコノハチョウぬん今帰仁えってぃん、なかなか見ららんしが。
Ｍ：あー、いちゃりがちぇーさやー、り思（うむ）てぃよー…。
Ｓ：アヤハベル、クシハベル、飛（とぅ）びみそーり、舞（もー）いみそーり。
Ｍ：むいぬきぬしちゃに アヤハベルもーてぃ わしるくとぅねさみ ふかきなさき
森ぬ木ぬ下に 綾蝶ぬ舞ーてぃ 忘るくとぅ無さみ 深き情き
Ｓ：いちまでぃんやー。
https://www.youtube.com/watch?v=81zTXZw2c_0
