Ｍ：興南高校ぬん負きてぃや。
Ｓ：甲子園大会ぬん始（ぱじ）まいしとぅまじゅん、なー終（う）わーたんどーやー。
Ｍ：あが早（ぺー）くなーからな？
Ｓ：どぅなーたーしまぬ出じらんねー、見っちんそーくねんしが。
Ｍ：あいやえんばーえっしが。
Ｓ：サヨナラ負けりいうしが、後味ぬ悪っさぬ。打撃力とぅ二番手ピッチャー鍛えらんねー、春ん夏ん一回戦敗退りいうしや合点（がってぃん）ならんどーやー。
Ｍ：なまや沖縄（ウチナー）ぬん、ベスト８くらいや当たり前（あてーめー）りいうぬ期待感ぬあいとぅやー。
Ｓ：昨日（きぬー）じちるだいしちぇーとぅ、野球ぬ話（ぱなし）やなーしむさ。来年（やい）期待さー。
Ｍ：あんしねー話や変わてぃ、酒井法子がとうとう出頭しちやー……。
Ｓ：はー、うぬ話（ぱなし）やしむさ、テレビやむるうりびかーよ。うりが前（めー）やぴじゅー裁判員裁判ぬくとぅびかーてー。他（ふか）にニュースや無（ね）んばーがやーり思（うみ）ぬあたいよ、ぴじゅ同じ事（ゆぬくとぅ）びかしーけーさしち。民放やなー見ーぬ気（きー）ん無（ね）んくなってぃちゅーしが。
Ｍ：あんしねー何（ぬー）見っちゃっくんばーがさー？
Ｓ：最近やちゃーにっかまでぃＮＨＫぬ「兵士たちの証言」でぃいうぬシリーズ見っちゅんばーえっしが、うりがでーじないい番組えんばーてー。最前線じ戦てーぬ兵隊達（ぴーたいたー）ぬ証言集（あち）みてぃ作（しく）らっとぅんばーえっしが、日本ぬしちぇーぬ戦争がちゃっさー無謀えったがりいうし、ゆー分かいんよーやー。
Ｍ：確かに、うぬシリーズやＮＨＫゆー気張（ちば）とぅさーやー。
Ｓ：うりが前（めー）にやヒロシマ・ナガサキぬ原爆関係ぬ番組んしちゅせーさーやー、用事ぬあてぃむるや見ららんしが、昨日（８日）ぬ「あの日・僕らの夢が消えた～長崎原爆特集」「被爆者からの手紙」ん、でーじないい番組えったーさー。
Ｍ：なまやなー原爆ぬくとぅん、戦争ぬくとぅん、ちゃんとぅ取り上ぎてぃ番組作いしやＮＨＫしかねんなてぃやー。民放やなーダメや、バラエティびかるえーむん、てぃーちんバラエティや無（ね）－らぬ。ウチナーぬ民放やなま沖縄戦ぬくとぅ扱（あちけー）しが、東京ぬ民放や見っち意味ぬあいぬ番組りちん無（ね）ーらぬ。
Ｓ：ＮＨＫぬん右翼からいるいる攻撃さっとぅんばーえっしが、うぬあたい良い番組作（しく）とぅんでいうぬくとぅえんばーえっさ。
Ｍ：うったーかい褒（ふ）みらりねーからお仕舞いえっとぅや。民放んかい社会派ぬドキュメンタリー番組、期待しちんダメれーがや。
Ｓ：社会派りいうぬ言葉（くとぅば）ん、はーまぺーく死語なっとぅんばーらんな。
Ｍ：まー、あいげら分からんしが、ただや、社会派りいうぬ言葉（くとぅば）ぬ死語ならばん、ならんかばん、なっぴんドキュメンタリーんさんねー、ニュースとぅスポーツ中継以外や、ＮＨＫしか見らりぬ番組、無（ね）んくなんどーやー。
Ｓ：まーうりや人（ちゅー）ぬ好みんあいるいる有いがはじえっしが、スポーツ中継ぬん芸能人ぬ騒ぎじゅーさぬ、にりりやすーさ。
Ｍ：話や変わいしが、くーぬ長崎ぬ平和祈念式典に麻生首相出で（いじ）とぅたんやー。
Ｓ：やがてぃや花輪落（う）とぅすたしが。
Ｍ：総理大臣えっとぅ出じゃさんねーならんがはじえっしが、「アメリカぬ傘や必要」りちうわーばいぐとぅあびったくとぅよ、あんち物（むぬ）分からぬ人（ちゅー）ぬん居（う）いさーやーり思（うみ）んでー。
Ｓ：原爆じ哀りしちぇーぬ人達（ちゅーたー）ぬ気持ち考え（かんげー）ゆさんばーえっさ。
Ｍ：情けない話えっさーやー。
Ｓ：ヒロシマ、ナガサキぬくとぅん、沖縄戦ぬくとぅん、日本ぬ侵略戦争ぬたみなかいアジア・太平洋ぬ各地じ起くてーぬくとぅん、忘（わっし）てぃやならんどーやー。ただ形式びかーぬ追悼式やあらん、死じぇーぬ人達（ちゅーたー）ぬ哀り、生き残（ぬく）てーぬ人達（ちゅーたー）ぬ気持ち、うみちか考え（かんげー）らんねー。
Ｍ：一人一人（ちゅいなーちゅいなー）ぬ努力さんねーやー。
Ｓ：あいれんどー。共感共苦りいうぬ言葉（くとぅば）んあんばーえっしが、肝苦（ちむぐる）せんでぃいうぬ言葉ぬ意味や、相手ぬ痛み自分（どぅー）ぬ痛みりち苦（くち）せんでぃ感じんでぃいうぬくとぅえんばーえっさ。ウチナンチューやうぬ言葉、大切（てーしち）にさんねーならんどーやー。
Ｓ：甲子園大会ぬん始（ぱじ）まいしとぅまじゅん、なー終（う）わーたんどーやー。
Ｍ：あが早（ぺー）くなーからな？
Ｓ：どぅなーたーしまぬ出じらんねー、見っちんそーくねんしが。
Ｍ：あいやえんばーえっしが。
Ｓ：サヨナラ負けりいうしが、後味ぬ悪っさぬ。打撃力とぅ二番手ピッチャー鍛えらんねー、春ん夏ん一回戦敗退りいうしや合点（がってぃん）ならんどーやー。
Ｍ：なまや沖縄（ウチナー）ぬん、ベスト８くらいや当たり前（あてーめー）りいうぬ期待感ぬあいとぅやー。
Ｓ：昨日（きぬー）じちるだいしちぇーとぅ、野球ぬ話（ぱなし）やなーしむさ。来年（やい）期待さー。
Ｍ：あんしねー話や変わてぃ、酒井法子がとうとう出頭しちやー……。
Ｓ：はー、うぬ話（ぱなし）やしむさ、テレビやむるうりびかーよ。うりが前（めー）やぴじゅー裁判員裁判ぬくとぅびかーてー。他（ふか）にニュースや無（ね）んばーがやーり思（うみ）ぬあたいよ、ぴじゅ同じ事（ゆぬくとぅ）びかしーけーさしち。民放やなー見ーぬ気（きー）ん無（ね）んくなってぃちゅーしが。
Ｍ：あんしねー何（ぬー）見っちゃっくんばーがさー？
Ｓ：最近やちゃーにっかまでぃＮＨＫぬ「兵士たちの証言」でぃいうぬシリーズ見っちゅんばーえっしが、うりがでーじないい番組えんばーてー。最前線じ戦てーぬ兵隊達（ぴーたいたー）ぬ証言集（あち）みてぃ作（しく）らっとぅんばーえっしが、日本ぬしちぇーぬ戦争がちゃっさー無謀えったがりいうし、ゆー分かいんよーやー。
Ｍ：確かに、うぬシリーズやＮＨＫゆー気張（ちば）とぅさーやー。
Ｓ：うりが前（めー）にやヒロシマ・ナガサキぬ原爆関係ぬ番組んしちゅせーさーやー、用事ぬあてぃむるや見ららんしが、昨日（８日）ぬ「あの日・僕らの夢が消えた～長崎原爆特集」「被爆者からの手紙」ん、でーじないい番組えったーさー。
Ｍ：なまやなー原爆ぬくとぅん、戦争ぬくとぅん、ちゃんとぅ取り上ぎてぃ番組作いしやＮＨＫしかねんなてぃやー。民放やなーダメや、バラエティびかるえーむん、てぃーちんバラエティや無（ね）－らぬ。ウチナーぬ民放やなま沖縄戦ぬくとぅ扱（あちけー）しが、東京ぬ民放や見っち意味ぬあいぬ番組りちん無（ね）ーらぬ。
Ｓ：ＮＨＫぬん右翼からいるいる攻撃さっとぅんばーえっしが、うぬあたい良い番組作（しく）とぅんでいうぬくとぅえんばーえっさ。
Ｍ：うったーかい褒（ふ）みらりねーからお仕舞いえっとぅや。民放んかい社会派ぬドキュメンタリー番組、期待しちんダメれーがや。
Ｓ：社会派りいうぬ言葉（くとぅば）ん、はーまぺーく死語なっとぅんばーらんな。
Ｍ：まー、あいげら分からんしが、ただや、社会派りいうぬ言葉（くとぅば）ぬ死語ならばん、ならんかばん、なっぴんドキュメンタリーんさんねー、ニュースとぅスポーツ中継以外や、ＮＨＫしか見らりぬ番組、無（ね）んくなんどーやー。
Ｓ：まーうりや人（ちゅー）ぬ好みんあいるいる有いがはじえっしが、スポーツ中継ぬん芸能人ぬ騒ぎじゅーさぬ、にりりやすーさ。
Ｍ：話や変わいしが、くーぬ長崎ぬ平和祈念式典に麻生首相出で（いじ）とぅたんやー。
Ｓ：やがてぃや花輪落（う）とぅすたしが。
Ｍ：総理大臣えっとぅ出じゃさんねーならんがはじえっしが、「アメリカぬ傘や必要」りちうわーばいぐとぅあびったくとぅよ、あんち物（むぬ）分からぬ人（ちゅー）ぬん居（う）いさーやーり思（うみ）んでー。
Ｓ：原爆じ哀りしちぇーぬ人達（ちゅーたー）ぬ気持ち考え（かんげー）ゆさんばーえっさ。
Ｍ：情けない話えっさーやー。
Ｓ：ヒロシマ、ナガサキぬくとぅん、沖縄戦ぬくとぅん、日本ぬ侵略戦争ぬたみなかいアジア・太平洋ぬ各地じ起くてーぬくとぅん、忘（わっし）てぃやならんどーやー。ただ形式びかーぬ追悼式やあらん、死じぇーぬ人達（ちゅーたー）ぬ哀り、生き残（ぬく）てーぬ人達（ちゅーたー）ぬ気持ち、うみちか考え（かんげー）らんねー。
Ｍ：一人一人（ちゅいなーちゅいなー）ぬ努力さんねーやー。
Ｓ：あいれんどー。共感共苦りいうぬ言葉（くとぅば）んあんばーえっしが、肝苦（ちむぐる）せんでぃいうぬ言葉ぬ意味や、相手ぬ痛み自分（どぅー）ぬ痛みりち苦（くち）せんでぃ感じんでぃいうぬくとぅえんばーえっさ。ウチナンチューやうぬ言葉、大切（てーしち）にさんねーならんどーやー。
