「遥か遠くの祈り」 ◇ 島言葉、スマフツ、しまくとぅばによる現代詩＝島ポエム ◇

あきもせず宮古島の島言葉（スマフツ）＝宮古語（ミャークフツ）で書いたものです。ご笑覧ください。

遥か遠くの祈り　　　　　松原敏夫

あがゐゑー
ゐーあがゐゑー

くぬ島ぬガヮンスゥぬガヮンスゥ
うわたあ　んざからが
ニジャからニーラ舟くぎぃ
んきゃーんぬ　あがーたからてぃ
島ぬ声聴すきぃ　ぷからすてぃ
生きむぬ　生き死に　また生まり
島神んぬ声や　のーしぬ声が
島神んぬ声ゆ　聴すきてぃ

アーグ（歌）ゆ　ささぎ
んぬつ　助きふぃーるてぃ
くぬ島ぬ木草ふさふさてぃ
ぴぃとぅ（人）　たーら
みるく世ぅ　マンダラんなり
とよみら　とよみぃ
かぬ世ん生きぅぴぃとぅ（人）たーら
あがゐゑー　ゐーあがゐゑー
タマス（霊魂）んなり
天ぬプス（星）んなり
はいらー　まーんてぃ
くぬ島ぬガヮンスゥぬガヮンスゥ
うわたあ　んざかいが

あけこぃうこぃ
ゐゑあぉう　おぅーみら
ゐゑあぉう　あけこぃうこぃ
とよみら　とよみぃ

天ぃだ（太陽）や　まゎーり　はいらー
夜ぬ月や　まゎーり　はいらー
天ぃんぬプスや　まゎーり　はいらー
鳥ぃや飛びぃ　風ぃや吹き
雲や流り　雨ぃや降り
うぷ海んな　かまーん　流りまーり
ぱずぃみから　いつがみまい

おぅーみら　おぅーみ
さーてぃ　さーてぃ
あがゐゑあぉう　おぅーみら

くぬ島ぬガヮンスゥぬガヮンスゥ
んざから来し　んざんかい去―たいがてぃ
何ーゆが取い食ぁいたいがてぃ
生きむぬ　生き死に　また生まり
島神んぬ声聴すき　ぷからすてぃ
みるく世ぅ　マンダラんなり
んぬつ　助きふぃーるてぃ

あがゐゑあぉう
あがゐゑあぉう

 

※ 新聞掲載の一部箇所に校正ミスがあり、直しました。