由於看到一些朋友不太理解視頻的演説內容，在我空餘之時，把該視頻的演講詞整理了一下，給喜歓但又不能理解意思的朋友以作參考。希望能對這些朋友有些微的作用。當然，其中因為自己的水平有限，肯定會有一些是謬誤的，請大家不咎賜教，批評指正。
孫逸仙先生于民國十三年五月卅日應上海《中國晚報》嘅邀請喺廣州演講嘅錄音片段之文字（1924年）
字幕
（視頻開始）
上海《中國晚報》，請孫大元帥演講。
喂，我哋大家係中國人，我哋知道中國幾千年來係世界上頂富頂強之國家，知道唔知道呢？ 但係，現在中國係乜嘢嘅情形呢？中國現在就變成係世界上頂貧頂弱嘅國，中國嘅人民出海外嘅，就被外國人欺負凌辱，看不上一個人樣！在中國外便呢，外國對于我哋嘅政府呢，對我哋嘅國家呢，亦係睇唔起！！
所以，外國就有意對中國來瓜分呢一說。後來呢，覺得呢個瓜分呢係好難實行，恐怕因為瓜分中國呢，惹出各國自己打自己。所以呢，現在各國就協同來商量，要把中國嘅國事來共管，大家來共管中國 ，就係呢睇中國唔起，以為中國係不能自己治中國。
諸君，你想想，我哋中國幾千年來係世界一個文明嘅國家。幾千年前中國最強盛嘅時候時代，所謂［千邦進貢，萬國來朝］，各國都要拜中國是上邦。到到今日呢，中國反為退化，呢個係為乜緣故呢？就係中國從受滿州征服以後，中國人就失了對國家精神。中國亡國於滿州二百六十幾年呢，中國人民在依二百六十幾年之內呢就睡著覺。所以，中國就政治退化、就文明退化、中國工商業退化，中國之所以到到今日就成為民窮財盡，就變成各國睇唔起。
中國墮落到今日依個地位，我哋做國民嘅要有一種乜嘢嘅感覺呢？我哋對於國家，第一件，我哋知道我哋今日之危險。先知道危險呢，我哋就要設法子嚟避呢個危險，咁用乜嘢法子能避得呢個危險呢？就要大家同心協力嚟贊成革命，用革命嘅方法，用革命嘅主義嚟救中國。
革命嘅主義係乜嘢呢？就係我哋嘅三民主義。第一，係民族主義；第二，民權主義；第三，係民生主義，用呢三種嘅主義呢來救中國！呢三種嘅主義呢，我哋就大家要留心、要嚟考究。從邊處能考究得呢個三民主義呢？對於呢個三民主義呢，我近日在呢個廣東高師，每個禮拜演說一次。頭一個民族主義呢，就演說hiu（意思：完了）六個禮拜就講完嘞；第二個民權主義呢，又演說hiu（意思：完了）六個禮拜講完；第三個呢，民生主義呢，不日再嚟演講。
現在呢呢個民權主義、民族主義，兩種呢已經係刻書出嚟啦。咁就要諸君呢，留心呢個三民主義呢，要將我呢個三民主義、呢篇演說，要嚟留心詳細嚟讀過。呢個三民主義呢，係講得好透澈嘅，係發揮得好精密嘅，裡頭呢，係好多新思想、好多新發明。諸君能讀呢個三民主義呢，就曉得用乜嘢方法嚟救國嘞。我哋能照住三民主義呢種嘅方法、呢種嘅精神，大家同心協力嚟救國呢，咁就中國就可以反弱為強嘞、轉貧為富嘞、就可以同今日之列強嚟並駕齊驅嘞！
（全視頻結束）