be good, be evil, be true to yourself

是日初五，潮水大漲大退之日。
這晚月亮像極了LUNATIC TOKYO的封面，但用cheap機無論如何是拍不到肉眼所見的。



世事當然有著百般無奈。





如是者我整天都思考著我應如何走這一條「應酬親戚」之路。

幾乎每次聚會我都是思考著同一個問題。
在社會的規範中，我是無論如何也不能割斷那條「血親」之線，如何有效地自然地分離親戚關係中的印象，是我一生中的一大課題。



這個問題還相當令我苦惱。

主要是我已經對自己嘗試再「connect」之後的一切重複又重複的動作感到生厭。

假如你一日比人問同一個問題超過十次，你能忍受只証明你忍得，別無其他。

好吧，首先說說我不能忍受的是什麼問題。

先由阿婆開始好了。
自從我讀大學以來，她就多了一句: 而家xx係大學生啦~叻女啦
我雖強調那似是真心歡樂的聲音而不是諷刺，但在眾人面前一而再而三的重複一個事實，想點?(並非指叻女)

而一個老人家，我開始懷疑她除了叫你食野之外，並無其他關心你的方法。
我知一個阿婆係同一個年輕人來自兩個星球講兩種語言的，但一個還處於一早起來整熟蛋然後帶一大盒由屯門走到西貢，明明有好多野食的時候，她問了我好好好好好多次叫我食蛋，大佬，我真係唔肚餓喎，我又真係吾想食d放左咁耐既蛋喎，咁點好?
又，他們是否喜歡以一個人的肥瘦來斷定關心度?
「你瘦左好多」的潛台詞是否在告訴你「我睇得出你瘦左好多睇我幾關心你」還是根本挖野黎講呢?

好謎，一個阿婆真係好謎。
有時我真係好想講粗口，講粗口並非我憎佢，而是一個對這種問候方式再忍受不了的宣洩。
大家當我不孝好了，但摒除一切五綱倫常，究竟佢同街邊一個阿婆有分別?我真係產生唔到一種感情，我投入唔到，係我O既經驗裡面，佢地比吾到我「一家人要相親相愛」的概念，我由細到大只係睇到呢家人不斷咁是是非非，點解要個個月整個聚會出黎扮熟?


我好唔明。呢個問題我諗左廿年了，我終於有D眉目。
我係B型血，我對我興趣以外既野係一D都吾會想做的(真係關事?)，我發覺我對呢家人既興趣係零。
係一D都吾想知吾想睇。
所以每次聚會我都會持續唔出聲成日，保持一個人形狀態，以免有係咁比人問: 係咪好悶呀~~~~(雖然最後都係仍然堅持係要問我)
總之唔出聲佢就會覺得你好悶，反之，懶係一大班人咪就叫熱鬧，就一似疑似開心咁款。總之同我既價值觀南轅北轍。

講真，細個係會悶既，但之後我都醒目自己識搵野做，帶本書又好周圍行又好，雖然係佢地眼中仍然係覺得我好悶咁款囉，總之其實做乜我都係好悶係啦。

然而，我唔悶，但我覺得最痛苦係係呢班人中我搵唔到自己的位置。
老實講，係呢D聚會之中，我一定係飯來張口，個意思係我唔會幫手任何野，因為佢地實在太多人，就算每次要走要行都要HEA好耐的，可想而言要做一件事，一來根本唔洗你，二來我我亦唔想理，唔係唔識係唔想甚至唔可以。我係呢D聚會之中，我發現自己o既狀態好似跳fuse一樣，「啪」一聲，同個世界斷晒，唔講唔做任何野，仍然係做自己野，例如我今日帶本書去睇。其實大家會分到係西貢既魚排睇書同係屋企睇書有分別呢?


如果係呢件苦惱事情上面，我就最討厭那狗養的「人情世故」。
很早之前我已說過出席這些聚會是「豪比佢」的心態。
就是說，我係大女，我好唔鐘意做某一件事但因為一種荒謬的關係迫得我要去做，我就叫好識「人情世故」。
所以我有時好憎我阿媽。
其實明知我唔鐘意去架啦，問左我十幾年做乜吾去，你唔係呀嘛?唔通你見我呢十幾廿年都好開心咁出席?其實理性社會唔係大家唔o岩channel就拉倒?
就係因為一d所謂係「識體面」「做個乖小孩」之類的社會規範，如果今日得我阿媽一個出現，後果當然吾會死，但要承受某一個無形的壓力，就我自己而言，當然係無所謂，最好你憎死我，重至死不相往來，就最好。
可惜唔得，呢個社會既關係網就係人人都怕自己被受排拒在外，所以每次我都吾知我阿媽都吾知真興奮定假開心，係真開心當然好，但每次都要我陪葬，我覺得真係吾係咁好囉。


但我真心覺得最搞笑係，究竟佢地問我: 悶吾悶呀 時，究竟出於心態?
其實問得呢句，已經係假設左我係悶啦(你條友自己自閉埋一邊，正常人都覺得你自閉)，咁我次次出黎都咁悶，點解重係要我出黎?
我出黎，經常聽到一個terms叫「比面」，咁潛台詞即係話我以前唔比面啦?
我份人就係咁賤格，都諗埋一邊，但我又真心覺得呢句係好仆街的。
每次我大姑姐講呢句(佢講得最多)，我就好反感。
我真係心諗，吾係人人鐘意大龍鳳，亦吾係人人鐘意多人既地方，我由姑至終都覺得呢d聚會係浪費我時間，你又比吾到滿足我，我又滿足吾到你既虛榮心(成日叫成大排人上佢屋企燒野野，夠大丫嘛)，何苦?
然而呢個世界就係咁仆街成日要折磨你。


講講下好似好激氣咁，其實又唔係，我今日自己係度睇書都過得好快活。
但我真心覺得咁樣落去唔掂，我有一期幾乎完全拒絕出席(所以先換黎比面的反應)，而再後期覺得咁樣阿媽好似有d慘，咁算啦，我豪一日出黎，換黎「好體面」既假象，但之後，如果次次都係咁，我發現我真係對佢地一d興趣都冇，自己係度睇書，其實根本實現吾到我當初我要表達我好識「人情世故」的預想。
但你要我融入佢地我真係做吾到.................

我有時覺得如果呢個世界有神咁係咪玩野?將我分配到一個完全同我格格不入的家族....其實我開始都覺得同我阿媽格格不入....
真係心諗，你地班人無朋友架?成日約出黎好似好親厚和睦咁款，我真係覺得好荒謬。而最荒謬係佢地覺得出左黎就好似好開心或一定開心，我唔排除佢地好開心既，但唔該唔好拖我落水丫，你唔好以為你地開心既野人地一定會開心先得架。


d師奶o既構造真係好特別的。
好似我阿媽咁，話唔知係邊見到個星星袋好靚，都係幾千yen左右，佢有同事過日本，想託佢買，但問題係個袋話係送比我囉。

我答佢:
1. 佢就咁陳述左一個叫「星星袋」o既物體我根本唔能夠想像到係乜野
2. 佢係經常老屈我成日買袋/野個個
3. 就算見到我都未必會鐘意

我既結論就係買呢舊野根本係佢自己開心。
佢係答我，我送野比你你都吾鐘意。
呢個世界d人就係咁，自以為送野出去收野個個人一定要鐘意，我對你咁好，你咁都吾領情?
好明顯係佢地自我感覺良好多過考慮人地感受啦。
其實咪同我班親戚一樣。



我地玩得咁開心，你做乜自閉埋一邊睇書?咁你一定係悶啦，吾得，你咁悶，係我地吾o岩，為左我良心好過d，我就要係咁問你: 悶唔悶呀/係咪好悶呀/做乜咁悶呀 之類o既無聊問題，去解救我地o既罪惡感。


然而佢地唔知係真心唔清楚定假唔知道，推我入無間深淵的正正就係呢種自以為好人的虛偽，話晒識左十幾廿年啦，次次出黎死老豆咁款，重要問?重係要迫我出黎?定係要靠我去維持呢個美好家庭的模範形象?(你睇我地幾快樂!)還是覺得要將我從自閉地獄解救出黎與眾同歡?





不明白，真的不明白。
我自出娘胎的最大疑問，一問就問了廿年，還是解決不了「親戚關係」。

可能放浪最好的方法。
我們時常看書看電影，有些人的大叔好浪子，終生不娶，周遊列國，在侄兒口中這位阿叔是非常神秘的，無人知道他的行蹤，似是和他們已再沒任何關係。而這些阿叔通常又不打理家族生意，不理家族間的明爭間鬥。
我發覺我只要一日係香港，就幾乎無可能發生這種事，看來我也要做浪子阿叔了。
be good, be evil, be true to yourself 是我之後決定所要做的。